மேற்குத் தொடர்ச்சி மலையை உடைத்து நொறுக்கும் நியூட்ரினோ திட்டத்தை நிறுத்த வேண்டும் என, மாநிலங்களவை உறுப்பினரும் மதிமுக பொதுச் செயலாளருமான வைகோ நாடாளுமன்றத்தில் வலியுறுத்தியுள்ளார்.

நாடாளுமன்ற மாநிலங்களவையில் இன்று (செவ்வாய்க்கிழமை) பூஜ்ஜிய நேரத்தில் மதிமுக உறுப்பினர் வைகோ நியூட்ரினோ திட்டம் குறித்துப் பேசியதாவது:

“தமிழ்நாட்டில் தேனி மாவட்டம் பொட்டிபுரம் கிராமத்தில் அம்பரப்பர் மலை என்ற கடினப் பாறைகளை உடைத்து நொறுக்கி, நியூட்ரினோ துகள்கள் ஆய்வு மையத்தை அமைக்க மத்திய அரசு திட்டம் வகுத்து இருக்கின்றது. அதற்காக, 1200 டன் டைனமைட் வெடிபொருட்களைப் பயன்படுத்தி 12 லட்சம் டன் கடினப் பாறைகளையும் ஒட்டுமொத்தமாக 20 லட்சம் டன் பாறைகளையும் உடைத்து நொறுக்கப் போகின்றார்கள்.

இந்தச் சுரங்கம் ஒரு கிலோ மீட்டர் நீளம் 25 மீட்டர் அகலம் 15 மீட்டர் சுற்றளவில் அமைகின்றது. உள்ளே பக்கவாட்டில் மேலும் இரண்டு சுரங்கங்களை ஒரு கிலோ மீட்டர் நீளத்திற்குத் தோண்டப் போகின்றார்கள். இந்த மூன்று சுரங்கங்களும் இணைகின்ற மையப் புள்ளியில் மட்டும் 11 லட்சம் டன் பாறை வெட்டி எடுக்கப்பட இருக்கின்றது. இந்த நியூட்ரினோ திட்டத்தால் உலகின் தொன்மையான கடினப் பாறைகள் நிறைந்த மேற்குத் தொடர்ச்சி மலையில் மிகக் கடுமையான சுற்றுப்புறச் சூழல் சீர்கேடு ஏற்பட இருக்கின்றது.

இந்த மேற்குத் தொடர்ச்சி மலையை, ஐநா சபையின் யுனெஸ்கோ பண்பாட்டு மையம் உலக பண்பாட்டுச் சின்னங்களில் ஒன்றாக அறிவித்து இருக்கின்றது. இங்கே சுரங்கம் தோண்டும் போது, 30 கிலோ மீட்டர் தொலைவில் உள்ள கேரளா மாநிலத்தின் மிகப்பெரிய இடுக்கி அணை உடைந்து நொறுங்கும். அதேபோல, பென்னி குயிக் கட்டிய தமிழகத்திற்குத் தண்ணீர் வழங்குகின்ற, முல்லைப் பெரியாறு அணையும் உடைந்து நொறுங்கும்.

நியூட்ரான் மற்றும் நியூட்ரினோ இரண்டுக்கும் உள்ள வேறுபாட்டை நான் அறிவேன். நியூட்ரினோ திட்டம் அமைய இருக்கின்ற இடத்தில் இருந்து 2.5 கிலோ மீட்டர் தொலைவில் கேரள எல்லை தொடங்குகின்றது. அங்கே மதிகெட்டான் சோலைக் காடுகள் உள்ளன. இவை பாதுகாக்கப்பட்ட காடுகளாக அறிவிக்கப்பட்டு இருக்கின்றது. மனிதர்களால் ஏற்படுத்தப்படுகின்ற நிலநடுக்கங்கள் குறித்து புவியியல் அறிஞர்கள் எச்சரிக்கை செய்துள்ளனர்.

இந்த நியூட்ரினோ திட்டம் 7000 கிலோ மீட்டருக்கு அப்பால் அமெரிக்காவில் உள்ள பெர்னி என்ற ஆய்வுக்கூடத்துடன் இணைக்கப்படுகின்றது. மேலும் இந்த ஆய்வகத்தில் அணுக்கழிவுகளை வைத்துப் பாதுகாக்கப் போகின்றோம் என்று இந்தத் திட்டத்திற்காக மத்திய அரசு வெளியிட்ட அறிவிப்பில் கூறப்பட்டுள்ளது. இதை நான் நீதிமன்றத்தில் சுட்டிக்காட்டியபோது, அது எழுத்துப் பிழை என்று மத்திய அரசு சொன்னது.

இந்தத் திட்டத்தை எதிர்த்து சென்னை உயர் நீதிமன்றத்தின் மதுரைக் கிளையில் நான் வழக்குத் தொடுத்து வாதாடினேன். அப்போது, இதற்கு முன்பு வழங்கப்பட்டுள்ள உச்ச நீதிமன்ற, மாநில உயர் நீதிமன்றங்களின் தீர்ப்புகளை மேற்கோள் காட்டினேன்.எனவே 2015 ஆம் ஆண்டு, மார்ச் மாதம் 22 ஆம் தேதி உயர் நீதிமன்ற மதுரைக் கிளை நியூட்ரினோ திட்டத்திற்குத் தடை விதித்து இருக்கின்றது. அதேபோல, பூவுலகின் நண்பர்கள் என்ற சுற்றுச்சூழல் இயக்கம், தேசிய பசுமைத் தீர்ப்பு ஆயத்தில் தடை ஆணை பெற்று இருக்கின்றது.

நியூட்ரினோ திட்டத்தை எதிர்த்து, 2018 ஆம் ஆண்டு மே மாதம் நான் மதுரையில் இருந்து கம்பத்திற்கு 200 கிலோ மீட்டர் தொலைவுக்கு பிரச்சார நடைபயணம் மேற்கொண்டேன். அதன் தொடக்க நாளில் மதிமுகவின் விருதுநகர் மாவட்ட இளைஞர் அணி துணை அமைப்பாளர் சிவகாசி ரவி தன் மேனிக்குத் தீ வைத்துக்கொண்டு, நியூட்ரினோ திட்டத்திற்கு எதிராக முழக்கங்களை எழுப்பி தன் உயிரை ஈந்தார்.

இந்த நியூட்ரினோ திட்டத்தின் முக்கிய நோக்கங்களுள் ஒன்று, உலகின் எந்த இடத்திலும் உள்ள அணுகுண்டுகளை செயல் இழக்கச் செய்வதாகும். எனவே, நாகசாகி, ஹிரோஷிமா போல எதிரி நாடுகளின் முதன்மையான தாக்குதல் மையமாகத் தமிழ்நாடு ஆகிவிடும் ஆபத்து ஏற்பட்டு இருக்கின்றது. கேரள மாநில முன்னாள் முதல்வர்கள் அச்சுதானந்தன், உம்மன்சாண்டி ஆகியோர் இந்தத் திட்டத்தை எதிர்த்துக் குரல் கொடுத்துள்ளனர்.

எனவே, இந்தத் திட்டத்தை மத்திய அரசு கைவிட வேண்டும்”.

இவ்வாறு வைகோ பேசினார். 

LEAVE A REPLY

Please enter your comment!
Please enter your name here