தூத்துக்குடி துப்பாக்கிச் சூடு; காவல்துறையினரை சாட்சிகளாகவும் சாட்சிகளை குற்றவாளிகளாகவும் காட்டி சிபிஐ தாக்கல் செய்த குற்றப்பத்திரிகை

0
222

தூத்துக்குடி துப்பாக்கி சூட்டை நடத்திய காவல்துறையினர் ஒருவரைக்கூட குற்றவாளியாக சிபிஐ வழக்கில் காட்டவில்லை” என்று துப்பாக்கிச்சூட்டில் கொல்லப்பட்டவர்களின் குடும்பத்தினர் தெரிவித்துள்ளனர். 

ஸ்டெர்லைட் துப்பாக்கிச் சூடு சம்பவம் நடைபெற்று 4 ஆண்டுகள் ஆன நிலையில் சி.பி.ஐ தனது 3-வது இறுதி அறிக்கையை தாக்கல் செய்துள்ளது. அதில் குற்றத்தில் ஈடுபட்ட ஒரு காவல்துறையினர் மீது கூட வழக்கு பதியவில்லை. குற்றவாளிகளை சாட்சிகளாகவும், சாட்சிகளை குற்றவாளிகளாகவும் காட்டியுள்ளனர்.

ஸ்டெர்லைட் எதிர்ப்பு மக்கள் கூட்டமைப்பினர், வக்கீல்கள் வாஞ்சிநாதன், அரிராகவன் மற்றும் தூத்துக்குடி துப்பாக்கி சூடு சம்பவத்தில் பாதிக்கப்பட்டவர்களின் குடும்பத்தினர் நேற்று மதுரையில் செய்தியாளர்களை சந்தித்தனர்.

பின்னர் ஸ்டெர்லைட் எதிர்ப்பு மக்கள் கூட்டமைப்பு வெளியிட்ட அறிக்கையில் கூறியிருப்பதாவது:- கடந்த 2018-ம் ஆண்டு மே மாதம் 22-ந் தேதி ஸ்டெர்லைட் எதிர்ப்பு போராட்டத்தில் 15 பேர் கொல்லப்பட்டு, 4 ஆண்டுகள் ஆகிவிட்டது. தற்போது தனது 3-வது இறுதி குற்றப்பத்திரிகையை மதுரை மாவட்ட தலைமை குற்றவியல் மாஜிஸ்திரேட்டு நீதிமன்றத்தில்  சி.பி.ஐ. தாக்கல் செய்திருக்கிறது. ஸ்டெர்லைட் நிர்வாகம், காவல்துறை, வருவாய்த்துறை அதிகாரிகள், கடந்த அ.தி.மு.க. அரசு இணைந்து நடத்திய இந்த சம்பவத்தை, விசாரிக்கிறோம் என்ற பெயரில், பாதிக்கப்பட்ட மக்கள் மீதே நூற்றுக்கணக்கான பொய்வழக்குகளை போட்டு சிறையில் அடைத்தது அன்றைய தமிழக காவல்துறை. உள்ளூர் போலீசார் விசாரித்தால் நீதி கிடைக்காது என்ற நிலையில்தான் சி.பி.ஐ. விசாரணைக்கு உத்தரவிட்டது நீதிமன்றம்.

போதிய நடவடிக்கை இல்லை சி.பி.ஐ. விசாரணையில் குற்றவாளிகளில் சிலராவது தண்டிக்கப்படுவார்கள் என்று மக்கள் எதிர்பார்த்தனர். அந்த எதிர்பார்ப்பு பொய்த்து விட்டது. கொல்லப்பட்ட தூத்துக்குடி மக்கள்தான் குற்றவாளிகள் என்றும், காவல்துறை, வருவாய்த்துறையினர் நிரபராதிகள் என்றும் சித்தரிக்கிறது இந்த குற்றப்பத்திரிகை. விக்னேஷ்குமார், மாரிஸ் பாபு முதலான 101 பேர் சட்டவிரோதமாக கூடி பயங்கரமான ஆயுதங்களால் போலீசாரையும், ஸ்டெர்லைட் குடியிருப்பையும் தாக்கினார்கள், கொலை மிரட்டல் விடுத்தார்கள், அரசு ஊழியரை பணி செய்யவிடாமல் தடுத்தார்கள், பொதுச்சொத்துக்கு சேதம் விளைவித்தார்கள் என்று 16 குற்றப்பிரிவுகளின் கீழ் மக்கள் மீது பொய் வழக்கு போட்டிருக்கிறது, சி.பி.ஐ. ஸ்டெர்லைட் நிர்வாகமே தயாரித்து கொடுத்ததை போன்ற அப்பட்டமான ஒருசார்பான இந்த குற்றப்பத்திரிகையில், சி.பி.ஐ.யாலேயே கூட சில உண்மைகளை மறைக்கவோ மறுக்கவோ முடியவில்லை.

ஸ்டெர்லைட் எதிர்ப்பு இயக்கம் எல்லா அரசியல் கட்சிகள், வணிகர்கள், மாணவர்கள், மீனவர்கள் உள்ளிட்ட சமூகத்தின் அனைத்துப் பிரிவினரின் ஆதரவு பெற்ற பிரமாண்டமான இயக்கமாக இருந்தது. இதை மாநில அரசின் நிர்வாகம் கணிக்கத் தவறிவிட்டது. 100-வது நாள் போராட்டம் பற்றி முன்கூட்டியே அறிவிக்கப்பட்டிருந்த போதிலும், பேரணி தொடங்குவதற்கு வெறும் 4 மணி நேரத்துக்குமுன் 144 தடை உத்தரவு பிறப்பித்தது பெரும் குழப்பத்துக்கு வழி வகுத்துவிட்டது என சி.பி.ஐ. ஒப்புக் கொள்கின்றது.

மேலும் கூட்டத்தினர் போலீசாரை விரட்டி, மாவட்ட கலெக்டர் அலுவலகத்திற்குள் தள்ளியதால், கூட்டத்தை கட்டுப்படுத்த காவல்துறையினருக்கு துப்பாக்கி சூட்டைத் தவிர வேறு வழியில்லாத நிலை உருவாகி விட்டதாக நெஞ்சறிய பொய்க்கதை சொல்கிறது. பல்வேறு கேள்விகள் துப்பாக்கிச்சூடு நடத்துவதற்கு முன்பு கலகக் கொடி உயர்த்துதல், முறையான அறிவிப்பு, தடியடி, தண்ணீர் பீய்ச்சி அடித்தல், வானத்தில் சுட்டு எச்சரித்தல் உள்ளிட்ட எவ்வித நடைமுறைகளும் பின்பற்றப்படவில்லை என்பதை நாடே அறியும். ஆனால் இந்த கேள்விகள் எதையும் சி.பி.ஐ. எழுப்பவில்லை. தொடர்புடைய வருவாய்துறை, காவல்துறை அதிகாரிகள் மீது அதற்கான குற்றப்பிரிவுகளில் கூட வழக்குப்பதிவு செய்யவில்லை. துணை தாசில்தார் சேகர், தனது அதிகார வரம்பை மீறி துப்பாக்கிச்சூடு நடத்த உத்தரவிட்டுள்ளார் என வேறு வழியின்றி ஒப்புக்கொள்ளும் சி.பி.ஐ., ‘இருந்தாலும் அவர் மீது குற்றமில்லை’ என்று அவருக்கு சான்றிதழ் தந்திருக்கிறது

ஸ்னோலின் உள்ளிட்ட 13 போராட்டக்காரர்கள் சுட்டுக் கொல்லப்பட்ட இடம், சூழல் என்ன? தப்பி ஓடியவர்களை எதற்காக சுட்டனர்? தடயவியல் மருத்துவ கூறாய்வு அறிக்கைகள் சொல்வதென்ன? 2 போராட்டக்காரர்களை ஏன் அடித்தே கொன்றனர்? மறுநாள் (மே.23) ஏன் துப்பாக்கி சூடு நடத்தப்பட்டது? கலெக்டர் அலுவலகம் தாண்டி மற்ற இடங்களில் ஏன் துப்பாக்கி சூடு நடத்தப்பட்டது? சம்பவத்தின்போது இருந்து பார்த்த சாட்சிகளான – போராட்டத்தை முன்னின்று நடத்திய ஸ்டெர்லைட் எதிர்ப்பு மக்கள் கூட்டமைப்பின் நிர்வாகிகளை சி.பி.ஐ. விசாரிக்காதது ஏன்? மக்களை கைது செய்து ஒப்புதல் வாக்குமூலம் பெறப்பட்டதுபோல் காவல்துறையினரை கைது செய்து விசாரிக்காதது ஏன்? கூட்டத்தினருக்கு அறிவுரை, வருவாய் அதிகாரிகளை அழைத்துப் பேசுவது, கோரிக்கையை நிறைவேற்ற உறுதி அளிப்பது, எச்சரிக்கை செய்வது, இறுதியில் குறைவான பலப்பிரயோகம் செய்வது, இறுதியாக பலர் உயிர் போய் விடும் என்றால் மட்டுமே சட்ட முறைகளைப் பின்பற்றி துப்பாக்கிச்சூடு நடத்த வேண்டிய காவல்துறை- கூட்டத்தை கட்டுப்படுத்த முடியவில்லை, போலீசை விரட்டினர் என்று கூறி நடத்திய துப்பாக்கி சூட்டை எப்படி நியாயப்படுத்த முடியும்?

ஆலைக்கு ஆதரவான நடவடிக்கை இந்தக் கேள்விகள் எதற்கும் சி.பி.ஐ.-ன் குற்றப்பத்திரிகையில் விடை இல்லை. மேற்கண்ட குற்ற இறுதி அறிக்கையைவிட மோசமான, பொறுப்புணர்வற்ற, புலனாய்வே இல்லாத ஒரு குற்றப்பத்திரிக்கையை இதற்கு முன் கண்டதில்லை.. இந்திய வரலாற்றிலேயே மோசமான குற்றப்பத்திரிகை என இதைச் சொல்லலாம். குழந்தைகள் எழுதுவது போன்று கதை எழுதப்பட்டுள்ளது. காவல்நிலையத்தின் 4 சுவர்களுக்குள் நடந்த ஜெயராஜ்- பென்னிக்ஸ், கொலையில் தொடர்புடைய போலீசார் இன்று வரை சிறையில் உள்ளனர். ஆனால் 4 ஆண்டுகளுக்கு முன்பு தூத்துக்குடியில் நடைபெற்ற இந்த 2-ம் ஜாலியன் வாலாபாக் படுகொலை என்பது அறைக்குள் நடக்கவில்லை. பட்டப்பகலில் நடந்தது. 2 வழக்குகளையும் சி.பி.ஐ.தான் விசாரித்திருக்கிறது. ஸ்டெர்லைட் படுகொலை வழக்கு ஒரு சார்பாக முடிக்கப்பட்டதன் காரணம்- அனில் அகர்வால். அவர் மோடி அரசுக்கு நெருக்கமானவர் என்பதுதான். அன்று அந்த துப்பாக்கிச் சூட்டை நியாயப்படுத்தி பேசிய ஒரே கட்சி பாரதீய ஜனதா கட்சி என்பதையும் இங்கே நினைவுProtest demanding a retrial in connection with the Tuticorin shootingsProtest demanding a retrial in connection with the Tuticorin shootingsபடுத்துகிறோம்.

தூத்துக்குடி படுகொலை எப்படி திட்டமிட்டு நடத்தப்பட்டதோ, அதே போல இந்த குற்றப்பத்திரிகையும் திட்டமிட்டே ஸ்டெர்லைட்டுக்கும் அதன் கையாட்களுக்கும் ஆதரவாக தயாரிக்கப்பட்டு இருக்கிறது. நீதி விசாரணை கோரி போராட்டம் மாநில – மத்திய அரசுகளையும், மாசு கட்டுப்பாட்டுத் துறையையும், வருவாய்த்துறை, காவல்துறையையும் கைக்குள் போட்டுக் கொண்டு தூத்துக்குடியை நஞ்சாக்கிய அனில் அகர்வாலின் கைக்குள் சி.பி.ஐ.யும் அடக்கம் என்ற உண்மை, இந்த குற்றப்பத்திரிகையில் இருந்து தெரியவருகிறது. குற்றப்பத்திரிகையை நாங்கள் நிராகரிக்கிறோம். சி.பி.ஐ.-ன் கடுகளவும் நேர்மையற்ற, உண்மைக்கு புறம்பான இந்த விசாரணைைய புறக்கணிக்கிறோம். நேர்மையான விசாரணையை கோருகிறோம். நீதிக்கான எங்களது போராட்டத்தை அனைத்துக் கட்சிகளும், தமிழக மக்களும் ஆதரிக்க வேண்டுமெனக் கேட்டுக் கொள்கிறோம். இவ்வாறு அதில் கூறப்பட்டுள்ளது.

LEAVE A REPLY

Please enter your comment!
Please enter your name here