குடியுரிமை திருத்தச் சட்டம்; முதல்கட்டமாக 32000 பேரை அகதிகளாக அடையாளம் கண்ட யோகி அரசு

0
320

உத்தரப் பிரதேசத்தில் குடியுரிமை திருத்தச் சட்டத்தை அமல்படுத்த ஏதுவாக, அகதிகளை கண்டறியும் பணி தொடங்கப்பட்டுள்ளது என்று, அந்த மாநில அமைச்சர் ஸ்ரீகாந்த் சர்மா தெரிவித்தார்.

இதுதொடர்பாக பிடிஐ செய்தியாளரிடம் அவர் கூறியதாவது: உத்தரப் பிரதேசத்தில் 75 மாவட்டங்கள் உள்ளன. குடியுரிமை திருத்தச் சட்டம் தொடர்பான அறிவிக்கை வழங்கப்பட்டு, அனைத்து மாவட்ட நடுவர் நீதிமன்ற நீதிபதிகளிடம் அகதிகள் குறித்த தரவுகளை சேகரிக்க அறிவுறுத்தப்பட்டுள்ளது. சஹாரன்பூர், கோரக்பூர், அலிகார், ராம்பூர், பிரதாப்கர், பிலிபிட், லக்னெள, வாராணசி, பஹ்ரய்ச், லகிம்பூர், மீரட், ஆக்ரா உள்ளிட்ட மாவட்டங்களில் இருந்து முதல் பட்டியல் கிடைத்துள்ளது.

முதல் பட்டியலில், 21 மாவட்டங்களில் 32,000-க்கும் அதிகமான அகதிகள் இருப்பது கண்டறிப்பட்டுள்ளது. மாநில உள்துறை அமைச்சகத்திடம் இருந்து கிடைத்த தகவலின்படி, மாநிலம் முழுவதும் இந்த நடவடிக்கை மேற்கொள்ளப்பட்டு வருகிறது. தரவுகள் கிடைப்பதன் அடிப்படையில் பட்டியல் புதுப்பிக்கப்படும் என்றார்.

அவரிடம், அகதிகள் எந்தெந்த நாடுகளை சேர்ந்தவர்கள் என்று கேள்வி எழுப்பப்பட்டது. அதற்கு பதிலளித்த ஸ்ரீகாந்த் சர்மா : அவர்கள் ஆப்கானிஸ்தான், பாகிஸ்தான், வங்கதேசம் ஆகிய நாடுகளை சேர்ந்தவர்கள் என்று தெரிவித்தார்.

இதனிடையே, நக்ரிக் அதிகர் மஞ்ச் என்ற தன்னார்வலரும், உத்தரப் பிரதேசத்தில் உள்ள அகதிகள் குறித்த தனது 116 பக்க அறிக்கையை மத்திய, மாநில அரசுகளுக்கு அனுப்பியுள்ளார். அவரது அறிக்கை கிடைக்கப்பெற்றதாக கூறிய உள்துறை அமைச்சக மூத்த அதிகாரி ஒருவர், அது கருத்தில் கொள்ளப்படுமா என்பது குறித்து பதில் அளிக்க மறுத்துவிட்டார்.

கடந்த ஜனவரி 10-ஆம் தேதி முதல் குடியுரிமை திருத்தச் சட்டம் நடைமுறைக்கு வருவதாக, மத்திய அரசு சார்பில் அரசிதழில் அறிவிக்கை வெளியிடப்பட்டது. 

LEAVE A REPLY

Please enter your comment!
Please enter your name here