உச்சநீதிமன்றத்தின் தீர்ப்பின் மொழி பெயர்ப்புகளில் தமிழ் இல்லை

0
140

உச்சநீதிமன்றத்தின் முக்கியமான தீர்ப்புகள் மாநில மொழிகளில் வெளியிடப்பட்டன. இதில் தமிழ் இடம்பெறாததால் பெரும் ஏமாற்றம் ஏற்பட்டு உள்ளது.

உச்சநீதிமன்றத்தின் முக்கியமான தீர்ப்புகள் அசாமீஸ், கன்னடம், தெலுங்கு உள்ளிட்ட மாநில மொழிகளிலும் வெளியிடப்படும் என உச்சநீதிமன்றம் சமீபத்தில் அறிவித்தது. இதற்கு நாடு முழுவதும் மிகப்பெரும் ஆதரவு காணப்பட்டது.

அதேநேரம் உச்சநீதிமன்றத்தின் இந்த நடவடிக்கையை வரவேற்ற தி.மு.க. உள்ளிட்ட தமிழக அரசியல் கட்சிகள், தீர்ப்புகளை தமிழிலும் மொழி பெயர்த்து வெளியிட வேண்டும் என கோரிக்கை விடுத்தன.

 உச்சநீதிமன்றத்தின் கட்டப்பட்டு உள்ள கூடுதல் கட்டிடம் ஒன்றை ஜனாதிபதி ராம்நாத் கோவிந்த் புதன்கிழமை திறந்து வைத்தார். அப்போது கன்னடம், அசாமீஸ் உள்ளிட்ட 9 மாநில மொழிகளில் மொழி பெயர்க்கப்பட்ட உச்சநீதிமன்றத்தின் முக்கியமான 100 தீர்ப்புகளை நீதிபதி பாப்டே அவரிடம் வழங்கினார்.

இந்த தீர்ப்புகளின் மொழிபெயர்ப்பை ஜனாதிபதி வெளியிட்டார். பின்னர் இந்த நிகழ்ச்சியில் பேசும்போது ராம்நாத் கோவிந்த் கூறியதாவது:-

உச்சநீதிமன்றத்தின் முக்கியமான 100 வழக்குகளின் தீர்ப்பின் மொழி பெயர்ப்புகளை பெற்றுக்கொண்டு, வெளியிடுவது மிகவும் மகிழ்ச்சி அளிக்கிறது. இது எனது இதயத்துக்கு மிகவும் நெருக்கமானது.

இதன் மூலம் இந்தியாவின் பல்வேறு மாநில மொழிகளில் தற்போது தீர்ப்புகளை வாசிக்க முடியும். ஆங்கிலம் தெரியாத லட்சக்கணக்கான சக குடிமக்களும் இந்த தீர்ப்புகளை அணுக முடியும்.

இதைப்போல 31 நீதிபதிகள் கொண்ட முழு பலத்துடன் உச்சநீதிமன்றம் இயங்குவதற்கு நடவடிக்கை எடுத்து வரும் கொலீஜியம் மற்றும் மத்திய அரசை பாராட்டுகிறேன் என்றார். 

இந்த நிகழ்ச்சியில் பேசிய தலைமை நீதிபதி ரஞ்சன் கோகாய், அரசியல் சாசனத்துக்கு கடந்த காலங்களில் ஏற்பட்ட பல்வேறு நெருக்கடிகள் மற்றும் அச்சுறுத்தலை உச்சநீதிமன்றம் தடுத்து நிறுத்தியதாக தெரிவித்தார்.

புதன்கிழமை வெளியிடப்பட்ட உச்சநீதிமன்ற தீர்ப்பின் மொழி பெயர்ப்புகளில் தமிழ் இடம் பெறவில்லை. 

LEAVE A REPLY

Please enter your comment!
Please enter your name here