இரண்டு அடுக்கு வரி விகிதம் மட்டுமே ஜிஎஸ்டியில் இருக்க நிதி ஆயோக் பரிந்துரை

0
407

இரண்டு அடுக்கு வரி விகிதம் மட்டுமே ஜிஎஸ்டியில் இருக்க வேண்டும் என்று நிதி ஆயோக் அமைப்பு பரிந்துரை செய்துள்ளது.

நாடு முழுவதும் ஒரே வரி விதிப்பு நடைமுறையை ஏற்படுத்தும் நோக்கத்தில் புதிய சரக்கு மற்றும் சேவை வரி (ஜிஎஸ்டி) 2017ஆம் ஆண்டின் ஜூலை மாதம் 1ஆம் தேதி மத்திய மோடி அரசால் அறிமுகப்படுத்தப்பட்டது. இதன்படி, அனைத்துப் பொருட்கள், சேவைகளுக்கும் ஒரே விதமான வரி முறை அமலுக்கு வந்தது. 5%, 12%, 18%, 28% ஆகிய நான்கு அடுக்குகளின் கீழ் வரி நிர்ணயம் செய்யப்பட்டுள்ள நிலையில் வரி விகிதங்களை இன்னும் குறைக்க வேண்டும் எனவும், சில பொருட்களுக்கான வரியை ரத்து செய்ய வேண்டும் எனவும் தொடர்ந்து கோரிக்கை வைக்கப்பட்டு வருகிறது. பெட்ரோல் – டீசலை ஜிஎஸ்டியின் கீழ் கொண்டுவர வேண்டும் என்ற கோரிக்கையும் வலுவாக இருக்கிறது.

இந்நிலையில் ஜிஎஸ்டி நடைமுறையில் இரண்டு வரி அடுக்குகள் மட்டுமே இருக்க வேண்டும் என்று மத்திய அரசின் ஆலோசனை அமைப்பான நிதி ஆயோக் தெரிவித்துள்ளது. இதுகுறித்து பிடிஐ செய்தி நிறுவனத்திடம் நிதி ஆயோக் உறுப்பினரான ரமேஷ் சந்த் பேசுகையில், “ஜிஎஸ்டி போன்ற மிகப் பெரிய சீர்திருத்தம் மேற்கொள்ளப்படும் போது சில நடைமுறைப் பிரச்சினைகள் வரத்தான் செய்யும். ஆனாலும் விரைவில் அப்பிரச்சினைகள் சரிசெய்யப்பட்டுவிடும். உலகின் சில நாடுகளில் கூட ஜிஎஸ்டி அமல்படுத்தப்பட்ட பிறகு நிலைமை சீராக நீண்ட காலம் ஆகியுள்ளது” என்றார்.

ஜிஎஸ்டி வரிகள் திருத்தப்படுவதால் வேளாண் துறையில் விவசாயிகளுக்குப் பிரச்சினை ஏற்படுவதாகவும் அவர் கூறினார். ஜிஎஸ்டி அமல்படுத்தப்பட்டு இரண்டு ஆண்டுகள் ஆகியும் இன்னமும் வரிக் குறைப்பு குறித்தும் வரி அடுக்குகளைக் குறைக்க வேண்டும் எனவும் கோரிக்கைகள் வந்துகொண்டுதான் இருக்கின்றன. அதே நேரம் ஜிஎஸ்டி விகிதங்களைக் குறைத்தால் அரசின் வரி வருவாயில் பாதிப்பு ஏற்படும் சூழல் இருக்கிறது. இருந்தபோதிலும் வரிக் குறைப்பு குறித்து நிதி ஆயோக் தரப்பிலிருந்து அரசுக்கு பரிந்துரை செய்யப்பட்டுள்ளது. இரண்டு நிலையான வரி அடுக்குகள் போதும் எனவும் நிதி ஆயோக் கூறியுள்ளது.

அரசின் நலத் திட்டங்களைச் செயல்படுத்துவதற்கே அதிகளவில் நிதி தேவைப்படுவதாகவும், வேளாண் துறைக்கு மட்டுமே ரூ.1.2 லட்சம் கோடி வரையில் மானியம் கொடுக்கப்படுவதாகவும் ரமேஷ் சந்த் கூறியுள்ளார். அரசின் வரி வருவாயில் மிகப் பெரிய பாதிப்பு ஏற்படாத வகையில் வரிச் சீர்திருத்தம் இருக்க வேண்டும் என்கிறார் அவர்.

———————————————————————————————————
———————————————————————————————————

LEAVE A REPLY

Please enter your comment!
Please enter your name here